2024年12月

文: Edgi ｜2024.12.20

圖: Edgi

報紙檔買MCB到冷門馬經、沙圈追星黎應揚

沙圈舉牌企定定第一排，等待憑著上月以爆冷姿態嬴得美國育馬者盃的「星迷」。

終於等到黎應揚上馬，騎著「星迷」從轉彎位走來，我大嗌 : Rossa Ryannnnnnnnn

12月，高興月，連番慶典，無心寫作。是日「冷門匡公Mode」四字寫作法，快手總結上半月。

月初先有Clockenflap音樂節，雖然無去但邊食花生邊睇片贈興。音樂節總有是非，今年是場內保安問題及陣容夠不夠吸引成為熱話。人們取向兩極，要不積極參與唯恐人生還有幾個十年; 要麼貴精不貴多，不夠吸引，唔去。我是後者，沒有令我心跳加速狂招呼亂叫的，都不出門。體力與時間，也是成本。

接近月中才是令我願意出動的時候。本地資深樂評人袁智聰連場MCB30音樂派對，出席了其中一場，已夠高興。袁總人生上半場貢獻了給音樂媒體，應予以掌聲。音樂與文字不能當飯吃，但精神素養至少令你不會去賣倫敦金或加入詐騙集團。30年前紙媒可當正行，作為後來的讀者我也在報紙檔裡尋找過MCB足跡幾年咁多。好一本黑白印刷的特刊，瞄盡冷門音樂大世界。如今在報攤找到黑白印刷的，就只有《冷門馬經》了(笑)。不敢想像一個從事理想化職業及創業的人，是如何在世俗中令自己舒適過來。這也是文化藝術令人尷尬的地方。場內認識了00後新朋友，內涵滿滿，有賴於網上世界，年青人對舊事物的認知相當豐富。然而本尊卻又犯了當長輩的大忌 -- 以自己年代的經驗去示意後輩不要這樣那樣 -- 失禮失禮。先鼓勵，後討論，再留白，才是長輩對後輩社交的相處之道。

社交圈中已貴為長輩，一顆追星之心卻不死 –- 只要夠吸引力的話。12月8日HKIR國際賽，外隊雲集，連英國著名練馬師岳伯仁都大駕光臨。馬迷戲稱他應該是全個馬場最有錢的人。Who Cares? 全個馬場最有吸引我嘅，係佢 –- 來港代表英國策騎「星迷」，只此一場的愛爾蘭騎師黎應揚揚揚揚揚揚 (Rossa Ryan)。

以馬論馬都知「星迷」(Starlust) 實力未夠，對上一次英國的轉播賽也只得第三。憑著上月以爆冷姿態嬴得美國育馬者盃，載譽來港，跟本地新一代短途王「嘉應高昂」沙田1200米比試。理得佢外隊唔外隊，我這個黑頭髮黃皮膚的，就是專程來見黎應揚Rossa Ryan這位好騎師兼運財童子一面。網上群組馬友說在他身上總共嬴得過萬，唔係講笑。然而本地主流馬迷不太認識外隊騎師，作為沙圈觀眾席中的一個異類，仲要高舉A3 「星迷」紙牌，身旁各位人士都覺得相當驚奇。

是咁的，追星數十載，從未試過舉牌，連十年前最迷Boy George個陣都未試過。我好肯定，性格內儉的黎應揚，一定對於我嘅叫喊及熱情不敢直視，於是決定舉牌，佢就一定見到我喇。「星迷」團隊對香港有Fans也感到少許驚喜。而喜怒形於色的潘頓對我為「星迷」舉牌，予以奇怪表情。終於等到黎應揚上馬，騎著「星迷」從轉彎位走來，我大嗌 : Rossa Ryan 、Rossa Ryan，再大嗌重音 Ryannnnnnnnnn，黎應揚才敢肯定是我跟他打招呼，腼腆的給我微笑。心想，好在同場競技的沒有莫雅 (Ryan Moore)，否則內向嘅佢一定以為我是叫Ryan的那個莫雅 (汗)。

同場加映 -- 沙圈見到應家柏出來跟黎應揚Say 個 Hi。應總致力吸納年青騎師來港，寒暄也是工夫的一部分吧。Well，以黎應揚內儉嘅性情，千祈唔好/唔可以黎香港做長工。你懂的。

可惜「星迷」入直路時被「賢德之君」夾一夾，無位上前而滯後，最終跑獲第13名。黎應揚明顯面帶些少失落。計起上來，從沙圈到出賽，只見到偶像8分鐘。

做明星做騎師需要青春，做瘋狂Fans雖然無年齡限制，但…. 回到家中才想到，好在平日養膚如養馬，托賴，否則追星舉牌頓變姜嬸就失禮死人。

聖誕開心Shopping，各個大牌大特價，情不自禁，慷慨解囊。護膚品、音樂節開銷、賭本，一個字，錢。唯有世俗層面重整旗鼓，買野唔使睇價錢，賭馬唔使窒住窒住，就爽囉。

跌宕的2024年，憎人富貴嫌人貧，無限放大。投注站走出來的人有輸有嬴，輸者得要沉著氣，嬴者，唯有低調。

ON! 文化 / CULTURE-ON

訂閱 CULTURE-ON

2024年12月