2024年10月

文: Edgi ｜2024.10.9

圖: Coolmore Stud FB

愛爾蘭之光 - 熱烈祝賀黎應揚勝出法國凱旋門大賽

英國騎師黎應揚 (Rossa Ryan) 憑「才情麗驥」(Bluestocking) 勝出法國凱旋門大賽 (Prix de l'Arc de Triomphe)

事件:

10月6日，英國騎師黎應揚 (Rossa Ryan) 憑「才情麗驥」(Bluestocking) 勝出法國凱旋門大賽 (Prix de l'Arc de Triomphe)。

而黎應揚係我鐘意到癲嘅英國年青騎師(實際來自愛爾蘭) -- 雖然賠率偏熱，我仲買左隻「護花騎士」博爆冷。但作為Fans，都知道如果係佢贏嘅話 - 會好感動。

結果 - 贏左。

馬圈反應：

買馬嘅野，真係觀點與角度。就算黎應揚勝出法國凱旋門大賽，賽馬節目主持人都冇乜comment咁。相比起人見人愛嘅超新星劉見龍(Billy Loughnane)，黎應揚真係始終仲係另類之選？

亦有馬迷話，其實呢D大賽咁慢步速，已經唔係好有水平之云云。

睇留言，英國國內都冇乜人知道黎應揚係乜水。其實佢本身就憑「鯊中飛」(Shaquille)贏過G1大賽。而佢都開始從戴圖理退休後接手座騎，如「湖畔鄉鎮」(Kinross)，香港馬主真識貨。

就好似黎應揚咁講，呢次勝仗係: "We have seen the Underdog take on Goliath and succeed." 黎應揚本身就係Underdog，總係唔係咁起眼，你睇我唔到，我就唔衰比你睇個隻。法國馬場播起英國國歌，認真威風，連佢自己都差D頂唔順流下男兒淚。

逢馬必博真騎師：

正值英國轉播賽旺季，兩年前第一次買英國馬，買親馬都有P （補充：新手嘅我大部分係用馬名黎揀馬），猛然發現一睇大部分都係由黎應揚策騎。有錢收當然視之為福將，再細心看其策騎表現，認真隻隻去馬（相比起本地個D大師傅真係情何以堪），明明本來得5566位置嘅機會，好多時都點都博哂老命跑個第3返黎。之後都愈騎愈有，間中 WP 照樣有著落。

睇英國馬睇得咁投入，除左因為戴圖理之外，第二大原因就係黎應揚。有錢收，有表現，有態度，黎應揚早就係我心中頭號當代偶像騎師。

睇過佢個訪問，佢出身自愛爾蘭賽馬世家，說話幽默欠奉態度憤世零Social。入行原因佢好無奈話佢冇得揀。賽馬以外亦熱愛足球。主持人話佢操條腰比起其他騎師更直，壓姿壓得更低（亦係博馬關鍵），佢就話佢操條腰都操左3年。

命運之子：

之前都寫過黎應揚際遇起伏，就連勝出凱旋門大賽之前嘅一場賽事，策騎「星迷」時，彎位入直路想埋欄博馬之際就比另外兩匹馬迫左入埋欄鏟出賽道，相當驚險，仲要輸埋隻熱門馬三甲不入。「星迷」比人累撞欄，估唔到「才情麗驪」面對眾多對手包括日本代表隊，竟然以半熱門姿態勝出凱旋門大賽，為其賽馬生涯攀上首個高峰。此小子高低起伏之運勢，又一証明。

從2022年被賽馬團體Amo Racing經理人解僱開始，事隔兩年，已經由低位走到高位，心水清嘅馬迷當然唔會忘記批㬹事件。

騎馬一向好博嘅黎應揚，連位置都要爭，咁梗有老師傅不滿喇，如蘇銘倫。就兩年前嘅一場三級賽，蘇銘倫為博爭位竟一肘將黎應揚鬆開，搞到黎應揚墮馬。好在命運之子頂得住，人馬無恙。

馬迷永記與蘇銘倫之恩怨：

凱旋門大賽當日嘅第2場，即G1尚盧利加迪大賽，當時覺得「印象創新」感覺唔錯，個日蘇銘倫著住件橙藍綵衣臨場個勢有D款有D格，腰又坐得直，相當醒神，如果唔係有私怨都已經落左飛。最後真係贏左。

到黎應揚勝出凱旋門大賽後，從口形可見到法國馬迷在沙圈辱罵正在為「大石」出場嘅蘇銘倫，蘇銘倫回頭喝罵還擊。（一定係法文版：「收皮喇，批㬹倫」）呢D畫面賽馬直擊一定隻字不提喇。

愛爾蘭特質：

作為樂迷，都知道Oasis、Boy George、Sinéad O'Connor都是愛爾蘭人，敢言、情緒化、有底氣，黎應揚雖然係騎師但都唔例外。而身為愛爾蘭人去到大英帝國主導嘅世界又自然比下去。賽馬訪問中問到佢嘅賽事出場音樂，佢就揀左愛爾蘭民歌 <Foggy Dew> ，係The Chieftains & Sinéad O'Connor嘅版本，作為自己嘅打氣歌。

ON! 文化 / CULTURE-ON

訂閱 CULTURE-ON

2024年10月