Loading... Please wait...

訂閱 CULTURE-ON


年少有威 The Strokes

17.07.2023-16.47.14-rec.png

 

 

7月16日賽馬煞科日，既無時間入場更無時間臨場下注，結果當日食白果，尾場「年少有威」更加Place都無。從網上新聞見到場內紀念品大特價兼且有一眾騎師在場大派馬公仔，認真走寶。不過因乜解究咁大犧牲呢 ? 皆因當日另有節目。馬成日有得睇，Show就唔係成日有架麻，講緊嘅就係7月16日，The Strokes Live In Hong Kong 首次香港演唱會嘅大日子。響世事多變嘅世代，依家要我預早買定演唱會門票確是心有不甘，結果Show前一星期兩條線，節目當日才稍為好轉及變為一條線，結果帶著疲乏的身驅 (和口罩)進場看Show。不過本尊已是搖滾老薑，只要一點氣氛已可一撻即著，少許不適絕對無礙觀賞以至又唱又跳。

之不過久未看Show，最不習慣當然是時間。本來就是企位的搖滾音樂會，還要在Show前「罰企」等開場，還好有煞科黃昏馬打發時間。手機看著沙田賽事，還吸引了警衛哥哥閒聊兩句談談馬經。連黃昏馬都幾乎就要跑完，大概晚上八點半才見一人樂隊Promiseland出場，大玩實驗電子搖滾，非常過癮。Promiseland演出後，還有最後一場賽事，我就唯有繼續心撃沙田，等待The Strokes的出場。

「年少有威」呢個馬名確實幾型，亦唔係個個都可以撐得起呢個名。用黎形容The Strokes呢隊一鳴驚人嘅紐約樂隊，絕對適合不過 --- 先天條件優厚，少年得志，人到中年，餘威仍在，The Strokes 肯定是少數沒有毀我童年的美好人物。現在樂隊好像從一匹少年得志的明星馬，過渡成為育馬者。樂迷都是識貨之人，哪怕他們是「富二代搖滾」，也一樣率性而為，譜出共鳴。穿Converse 、窄腳牛仔褲，真的影響著不知多少年的衣著品味。奇怪的是，場內的零零後也不少，專輯 “Is This It” 他們大概才剛出世吧 ? 作為一隊已發展出更成熟的音樂面貌的樂隊，難得的是樂隊不介意大比例獻唱當年 “ Is This It”的金曲，得到進步的同時，也沒有要跟自己的歷史過不去。金曲一響，我這個老薑突然感到死去活來了。廿年驀然回首，只要搖滾一響，「我仲未死」。