ON! 文化 / CULTURE-ON

電影節又黎喇。唔經唔覺已經50年。一如以往，會先比音樂為主題嘅電影吸引，更何況，呢齣《末世狂沙》由艾慕杜華監製，睇黎唔簡單。一入場，戲院裡嘅電子節拍已深深勾引靈魂。戲入面中年父親帶住年幼兒子，去搵失蹤左嘅囡囡。聽講有人見過佢個囡曾經響一個神秘電音派對入面出現過，於是乎，兩父子穿梭沙漠電音派對，拎住部電話周圍問派對入面嘅人:「有無見過相入面個女仔?」

曾幾何時，我對呢類 90年代嘅跳舞音樂，又或者所謂嘅Rave，充滿疑問。好地地嘅跳舞派對，點解會有咁多暗黑色彩、充滿恐嚇、壓迫而「危險」嘅聲音? 808 State、The Future Sound of London 、Opus III、The Prodigy 等嘅音樂， 到近代英倫樂隊Friendly Fires向Rave致敬的專輯 “Pala”，令人又愛又怕。由簡單嘅節奏、慢慢變成迷幻，最後深入虎穴，以扭曲嘅聲效造出幾近死亡嘅聲音。象徵意義係代表派對入面吸毒嘅人群，因為搞地下派對而隨時會被追捕嘅犯罪份子，定係一部分跳舞音樂愛好者背後畏天敬地嘅宗教哲學?

我覺得《末世狂沙》就好似將呢種音樂嘅布局，去寫成一部電影。現實入面，恐嚇、壓迫而危險嘅事，離唔開戰爭、政治、死亡。法國加尼西亞裔導演 Oliver Laxe 顯然運用對跳舞音樂嘅熱愛，集結呢幾種原素去構想第三次世界大戰，用官能刺激同觀眾玩一次密室逃脫 !

其實電影並唔係冇用傳統嘅方式去講故事: 童孩嘅純真、中年人嘅睿智、以至小狗嘅情懷，連同各式其式嘅派對Raver，作為偏鋒的公路電影，竟然有《綠野仙蹤》嘅大愛同溫暖。咁又係，既然跳舞音樂係電影嘅中心思想，Rave舞池入面嘅無分你我，當然亦係導演想宣揚嘅精神。所以連公路上面認識嘅陌生 Raver，都係有情有義嘅大好人。

世界險惡，唯音樂善良。 

最後尋找失蹤女兒無下文，因為各人自身已經難保。險穴愈走愈深，音樂嘅迷離，喇叭嘅神聖，唔知自己幾時係最後一次聽音樂，任由電子音樂及民族音樂詮釋生命各種光境。同一首歌，都可以唱著不同嘅命運。當車輛愈走愈遠，人定勝天嘅樂觀，慢慢變成聽天由命嘅無奈。

而觀眾連最後一粒電音都唔放過，睇Credit字幕都睇到最尾。我就話，法國電音製作人Kangding Ray 嘅配樂，先至係領銜主演。