ON! 文化 / CULTURE-ON

在上集《又要威，又要除頭盔》裡面，偉霆雖然夢想能進銀行工作，可是他足足考了21次筆試都失敗，為了謀生，唯有揸電單車做的士仔。但為咗令阿媽放心，偉霆日日都「cosplay」銀行經理呃家人喺銀行返工。不過巧合重遇真正的銀行妹、青梅竹馬的樂童，再加上世叔伯鼎爺對偉霆的工作心生猜疑，令偉霆日日都擔心大話會穿煲！好在一班死黨出力幫拖，偉霆才得以瞞過家人，但最終被樂童一言驚醒夢中人，決定不再靠呃，真真正正考入銀行；更無意中踢爆樂童男友冠A偷食，令二人分手之餘，自己與樂童的感情亦更進一步。最後樂童亦決定離開自己的「Comfort Zone」，辭去銀行的職位準備去考飛機師，亦是因為她離職後的空缺，偉霆才得以順利獲銀行錄取，實現自己的夢想。

泰國喜劇人才濟濟，今次《又要威，又要除頭盔2》再度雲集泰國多位搞笑紅星，以容易入口的家庭題材，扮鬼扮馬，玩盡假情侶見家長的搞笑騎呢位。其實上集和今集一樣，除咗偉霆同樂童嘅愛情線，亦主打家庭、親情等元素，今集更加入兩個家庭的矛盾衝突，令笑料更多更精彩。尤其是沙膽與鼎爺之間的針鋒相對，可謂鑊鑊新鮮鑊鑊爆笑。除此之外，偉霆與花姐、樂童與沙膽的兩段母子父女情，同樣貼近大眾生活。花姐口講唔幫偉霆呃人，後來又衰心軟；沙膽看似嚴父性格，卻是鐵漢柔情，一心只想乖女樂童有幸福生活。兩段親情都勾勒出家庭的典型模樣，相信許多觀眾都會看得相當有共鳴。